काठमाडौं । शनिबार नेपाली कांग्रेस डडेलधुराका दुई दर्जन नेता कार्यकर्ता पार्टी सभापति तथा प्रधानमन्त्री शेरबहादुर देउवालाई भेट्न बालुवाटार पुगे ।
निर्धारित समयभन्दा तीन घण्टा ढिला गरी उनीहरुले देउवालाई भेट्ने समय पाए । निकै तनावमा देखिएका देउवाले उनीहरुलाई छिटो आफ्नो कुरा राख्न निर्देशन दिए ।
Advertisement
प्रतिनिधिसभा १ र प्रदेशसभाका २ सिट रहेको डडेल्धुरामा संघमा देउवा उमेदवार बन्ने निश्चित छ ।
सत्ता गठबन्धनको भागवण्डामा प्रदेशसभा ‘क’ माओवादीको भागमा परेको छ भने ‘ख’ कांग्रेसको भागमा परेको छ ।
माओवादीले तीनपटक देउवासँगै हारेका खगराज भट्टलाई प्रदेशसभा ‘क’ को उमेदवार बनाउने टुङ्गो लगाइसकेको छ ।
त्यही प्रसंग कोट्याउँदै कार्यकर्ताले माओवादीलाई प्रदेशसभा ‘क’ दिन नहुने माग गरे । कार्यकर्ताहरुले कांग्रेस जिल्ला सभापति भीमबहादुर साउँदको व्यवस्थापन गर्न माग गरे ।
उनी परशुराम नगरपालिकाका निवर्तमान मेयर समेत हुन् ।
कार्यकर्ताले त्यो माग सुनेपछि देउवा झोँक्किए । भेटमा सहभागी एक नेताले भने,“गठबन्धनमा दाँयाबाँया हुँदैन । तपाईहरुले के भन्न खोजेको ? तपाईहरु प्रचारमा गाउँ नगए पनि हुन्छ । बस्नुस् यतै ! काठमाडौंमा । म चुनाव हार्दा के हुन्छ । हारौंला खगराज पनि हार्लान् ।”
भेटमा सहभागीहरुले माओवादीलाई भोट दिन नसक्ने बताएका थिए ।
त्यसपछि देउवाले फेरि भने,“मैले प्रचण्डको टाउकोको मूल्य तोक्या होइन । माओवादीले मलाई मार्न गोली हान्या होइन ? हामी मिलेका छौं त, तपाईँहरु पनि मिल्नुस् । राजनीतिमा सधैं एकैनास हुँदैन ।”
देउवाका तीन पटकका प्रतिष्पर्धी खगराज भट्ट प्रदेशमा उमेदवार बने पनि कांग्रेसभित्रकै विवादले देउवाका लागि चुनौती थपिएको छ ।
कांग्रेस पूर्वजिल्ला सभापति कर्ण मल्ल नेपाली कांग्रेस बीपीको तर्फबाट देउवाविरुद्ध उमेदवारी दिने तयारीमा छन् । उनलाई एमालेले समर्थन गर्ने सम्भावना छ ।
डडेल्धुरामा कांग्रेसभित्र विवाद बढ्दो छ । विवाद मिल्न नसक्ने गठबन्धनलाई नै धक्का लाग्ने नेताहरु बताउँछन् ।
