नेकपा एमालेका अध्यक्ष केपी शर्मा ओलीले नेकपाको पाँच वर्षे सरकारलाई बीचैमा ढालेर पुष्पकमल दाहाल प्रचण्ड र माधवकुमार नेपाल अहिले भिखमंगाजस्तो गरी दुनो लिएर हिँडेको बताएका छन्।
Advertisement
वामगठबन्धन हुँदै एमाले र माओवादी एकीकरण गरेर नेकपा बनेपछि ओली प्रधानमन्त्री बनेका थिए। तर प्रतिनिधि सभा विघटनपछि अदालतको आदेशमा नेकपा खारेज भई एमाले र माओवादी पुन अस्तित्वमा आएका थिए।
नेकपा हुँदाका अवस्थाका कुरा निकाल्दै आज ओलीले प्रधानमन्त्रीसहित मन्त्रीहरू सबै आफ्नै पार्टीको हुँदा पनि प्रचण्ड-माधव नेपालले काम गर्न नदिएको र सरकार ढालेको बताए।
दोस्रोपटक प्रतिनिधि सभा विघटन गरेपछि अदालतको परमादेशबाट ओली प्रधानमन्त्री हटेर गत असार २९ मा शेरबहादुर देउवा गठबन्धनबाट प्रधानमन्त्री बनेका थिए।
नेकपा माओवादी केन्द्रका अध्यक्ष प्रचण्ड र नेकपा एकीकृत समाजवादीका अध्यक्ष माधवकुमार नेपालप्रति टिप्पणी गर्दै आज ओलीले बुद्धिजिवी परिषदको महाधिवशेनमा भने, ‘यिनीहरूले गठबन्धन कायमै रहनुपर्छ भनेर किन भनिरहेका छन्?’
प्रचण्ड र माधव नेपालले पाँचदलीय गठबन्धनलाई चुनावसम्म कायमै राख्ने बताइरहेका छन्। गठबन्धन बैठकले पनि चुनावसम्म सहकार्य गरेर जाने निर्णय गरिसकेका छन्।
‘किन यिनीहरूले गति छाडे? आन्दोलन, पार्टी र विकासविरूद्ध लागेर ५ वर्ष सरकार चल्नेमा बीचैमा छाडेर अस्थिरता ल्याएका थिए,’ प्रचण्ड-माधवप्रति कटाक्ष गर्दै ओलीले भने, ‘यिनीहरूलाई दक्षिणपन्थी सरकार नबनाई नहुने? आफ्नै पार्टीको प्रधानमन्त्री थियो, मन्त्री थिए। तर प्रधानमन्त्रीलाई यिनीहरूले बसिखान दिएका थिए? अहिले भिखमंगाजस्तो दुनो लिएर हिँडेका छन्।’
