जनता समाजवादी पार्टी नेपालका अध्यक्ष महन्थ ठाकुरले जसपा आफूहरुको आधिकारिक पार्टी भएको दाबी गरेका छन् । पछिल्लो समयमा जसपा थप बलियो भएको बताउँदै उनले अरुले केही संख्या देखाउँदैमा आधिकारिकताको दावी गर्न नमिल्ने धारणा राखे ।
Advertisement
शनिबार जसपा महन्थ ठाकुर पक्षको वागमती प्रदेशले आयोजना गरेको अगुवा कार्यकर्ता भेलालाई सम्बोधन गर्दै उनले पहिचानका लागि संविधान संशोधन हुनुपर्नेमा जोड दिए । अहिलेको संघीयता पहिचानको आधारमा नरहेको उल्लेख गर्दै उनले त्यसलाई सच्याउनका लागि संविधान नै संशोधन गर्नुपर्ने धारणा राखे । यसअघि आफूहरु विशेष परिस्थितिमा सरकारमा गएको बताउँदै उनले सरकारलाई चाँडो पूर्णता दिएर कोभिड–१९ का लागि खोप उपलब्ध गराउन पनि माग गरे ।
ठाकुरले जसपा नेपाल उत्पीडनमा परेका जनताको पहिचानका लागि संघर्ष गरिरहेको हुनाले त्यसलाई कमजोर नठान्न पनि आग्रह गरे । उनले भने–‘जसपामा जनताहरु संगठित हुँदैछन्, चाँडै नै पहिचानका लागि संघर्षको सुरुवात हुन्छ ।’ ठाकुर पक्षका अर्का नेता शरतसिंह भण्डारीले पनि जसपा आफुहरुले बडो दुःखले बनाएको बताउँदै यसमा अरुले दावी गर्न नमिल्ने धारणा राखे । जसपा संघर्षका लागि जन्मेको पार्टी भएको र यसले संघर्षको यात्रा तय गरिसकेको बताउँदै उनले उत्पीडनमा परेका समुदायको हक अधिकारका लागि सङ्घर्षरत रहने बताए ।
साभार: रातोपाटी
